Сярод страў беларускай кухні асаблівае месца займаюць дранікі — аладкі з бульбы, якія сталі сапраўдным сімвалам нацыянальнай традыцыі. Хоць падобныя стравы сустракаюцца ў іншых краінах, менавіта беларускі варыянт атрымаў шырокую вядомасць дзякуючы асабліваму смаку і сакрэтам мясцовых гаспадынь.

Асноўная прычына такой папулярнасці — унікальныя якасці беларускай бульбы. Яна адрозніваецца высокім утрыманнем крухмалу, што робіць стравы больш духмянымі і насычанымі.

Беларусы традыцыйна спажываюць вельмі шмат бульбы: паводле статыстыкі, на аднаго чалавека прыпадае больш за 180 кілаграмаў у год. Таму і ў кухні існуе вялікая колькасць страў, дзе бульба выступае галоўным інгрэдыентам — ад клёцак і бабкі да калдуноў і пызоў.

З ХІХ стагоддзя дранікі сталі адной з самых папулярных страў на беларускім стале. Іх часта гатавалі на снеданне, бо яны не толькі смачныя, але і вельмі сытныя.

Класічны спосаб падачы — са свежай хатняй смятанай. Але існуюць і іншыя варыянты: з мачанкай, маслам, шкваркамі з цыбуляй. У некаторых рэгіёнах дранікі тушылі ў гаршчочках разам з грыбамі, морквай, цыбуляй, каўбаскамі і вяршкамі.

Асноўны рэцэпт
Інгрэдыенты:
• бульба — 12 шт.
• цыбуля — 1 шт.
• соль
• алей для смажання

Прыгатаванне:

1. Ачысціць і прамыць бульбу, надраць яе на дробнай тарцы разам з цыбуляй (каб маса не пацямнела).
2. Пасаліць і добра перамяшаць.
3. Разагрэць алей на патэльні, выкласці цеста невялікімі порцыямі.
4. Смажыць 2–3 хвіліны да залацістай скарыначкі, перавярнуць і абсмажыць яшчэ 1–2 хвіліны.
5. Падаваць гарачымі са смятанай.

Сакрэты гаспадынь
• У традыцыйным рэцэпце не выкарыстоўваюцца яйкі і мука.
• Калі цеста атрымалася занадта вадкім, з бульбы зліваюць сок і дадаюць крухмал, які асеў на дне.
• Для разнастайнасці можна дадаць спецыі, муку або яйкі — у залежнасці ад густу.