У самым разгары гарачае жніво. Хлебаробы ловяць кожную пагожую хвілінку для працы. І на вагу золата для іх любая дапамога. У тым ліку і ад самых юных.

Старшакласнікі Старасельскага ВПК д/с – СШ кожны год з задавальненнем уладкоўваюцца на збожжасушыльны комплекс «Стараселле» ААТ «Александрыйскае». «Працую са школьнікамі ўжо не першы год, – расказвае загадчыца комплекса Алена Савіцкая. – Дзеці – малайцы, стараюцца. Некаторыя з іх тут другі ці трэці год запар, самі просяцца летам папрацаваць».

Падмесці, подгрэсці збожжа, разраўняць яго – праца, здавалася б, не складаная, але вельмі важная ў гарачую пару. Тыя, каму яшчэ не споўнілася 15 год, працуюць 4 гадзіны ў дзень.
«У мінулым годзе зарабіў 400 рублёў, – дзеліцца з намі Кірыл Лашакоў. – У гэтым нават не раздумваў, ці ісці працаваць. Мне вельмі падабаецца на збожжатаку».

А вось Аляксандра Чумак і Марыя Халяўка тут першы год. Паслухалі старэйшых таварышаў і не расчараваліся. «Працаваць падабаецца,  калектыў у нас цудоўны, час праводзім не толькі з карысцю, але і з добрым настроем», – расказваюць дзяўчаты.

Кожны дзень на збожжасушыльны комплекс прывозяць зерне магутныя МАЗы. « Сушым да вільготнасці 14%, – расказвае Алена Савіцкая – Калі збожжа ўжо сухое –ачышчаем і адпраўляем на склад. Ураджаем у гэтым годзе задаволены. Будзем з хлебам!»