Штогод у першыя выхадныя верасня наша краіна адзначае адно з самых значных і духоўных свят – Дзень беларускага пісьменства. І гэта не проста даніна павагі кнізе і роднаму слову. Гэта зварот да нашых каранёў, да гісторыі, якая стагоддзямі стваралася асветнікамі і творцамі.

Свята пісьменства традыцыйна праводзіцца ў гарадах, якія з’яўляюцца гістарычнымі цэнтрамі культуры, навукі, літаратуры і кнігадрукавання. Яно нагадвае нам пра велічны шлях, які прайшлі наша мова і культура: ад першых рукапісаў, ад асветніцкай дзейнасці Ефрасінні Полацкай і Кірылы Тураўскага да першай друкаванай кнігі Францыска Скарыны, якая назаўжды ўпісала Беларусь у сусветны культурны кантэкст.

Для Магілёўскай вобласці гэтае свята заўсёды мае асаблівае значэнне. Яшчэ ў 2007 годзе сталіцай XIV Дня беларускага пісьменства быў наш старажытны Шклоў – горад з багатай гісторыяй, непарыўна звязаны са стварэннем славутага тэатра Зорыча і развіццём асветніцтва. Шклоўская зямля ганарыцца цэлай плеядай выдатных творцаў, сярод якіх паэты Ніна Галіноўская, Анатоль Сербантовіч, Яўген Крупенька і іншыя. Іх словы назаўжды ўпісаны ў літаратурны скарб нашай краіны.

А ў 2026 годзе ганаровае права стаць сталіцай XXXIII Дня беларускага пісьменства атрымалі Касцюковічы. Выбар горада не выпадковы, бо Касцюкоўшчына – гэта край, які нарадзіў і выгадаваў таленавітых людзей, чые імёны залатымі літарамі сабраны на старонках нацыянальнай літаратуры. Сёлета 5 і 6 верасня тысячы гасцей з усёй краіны збяруцца тут, каб дакрануцца да літаратурнай спадчыны нашага рэгіёна.

Гаворачы пра Касцюковіцкую зямлю, немагчыма не згадаць яе самых славутых ураджэнцаў, якія сталі гонарам усёй Беларусі. Менавіта тут, у вёсцы Саматэвічы, нарадзіўся народны паэт Беларусі, франтавік, тонкі лірык і майстар эпічнага слова Аркадзь Куляшоў, чый знакаміты верш «Бывай, абуджаная сэрцам, дарагая» стаў шчымлівай песняй, якую ведае кожны беларус. У вёсцы Вялікі Бор з’явіўся на свет народны пісьменнік Беларусі, сцэнарыст і драматург Іван Чыгрынаў. Яго эпічныя раманы, такія як «Плач перапёлкі» і «Апраўданне крыві», сталі сапраўднай энцыклапедыяй жыцця беларускай вёскі ў самыя складаныя перыяды гісторыі, і нездарма сёння яго імя з гонарам носіць цэнтральная бібліятэка ў Касцюковічах. Таксама на Касцюкоўшчыне нарадзіўся выдатны беларускі паэт, эсэіст Алесь Пісьмянкоў, чыя лірыка лічыцца адной з самых светлых і шчырых у айчыннай літаратуры.

Дзень беларускага пісьменства ў Касцюковічах – гэта маштабны фестываль, дзе чакаюцца сустрэчы з сучаснымі пісьменнікамі, прэзентацыі новых выданняў, узнагароджанне пераможцаў Нацыянальнай літаратурнай прэміі, майстар-класы і кніжныя выставы. Гэтае свята нагадвае нам простую, але вельмі важную ісціну: пакуль жыве мова, пакуль чытаюцца кнігі на роднай мове – жыве і нацыя. Чытайце беларускае, шануйце сваё слова і перадавайце гэтую любоў наступным пакаленням!