У в.Царковішча, па ўсяму бачна, прыезду цягніка чакалі. Некалькі жыхароў гэтай невялікай па сучасным меркам вёскі размясціліся на лаўках пад ценем высокай бярозы каля аднаго з дамоў, паставілі стол з ахаладжальнымі напоямі.  

Сяргей Артамонаў, начальнік аддзела ідэалагічнай работы, культуры і па справах моладзі райвыканкама адразу пазначыў мэту наведвання вяскоўцаў.Таксама распавёў ён і пра тое, што многія з пытанняў, што падымаліся жыхарамі іншых весак, ужо вырашыліся. Не абмінуў ён увагай і выбары ў Палату Прадстаўнікоў Нацыянальнага сходу Рэспублікі Беларусь, напомніўшы пра дату іх правядзення. 

На гэты раз дыялог з жыхарамі пачаўся адразу з праблемных пытанняў. Вяскоўцаў Царковішча хвалюе пытанне калодзежу, казалі, што трэба яго пачысціць. Аднак у ходзе размовы высветлілася, што карыстаюцца ім не вельмі часта. Былая даярка мясцовага калгаса, а зараз пенсіянерка, прасіла «каб прывезлі пяску». На момант падрыхтоўкі матэрыялустала вядома, што дзякуючы садзейнічанню ААТ «Новае Юбілейнае» гэтае пытанне было аператыўна вырашана. Паскардзіліся жыхары і на тое, што з мясцовых могілак, калі праводзілі ўборку па вясне, звезлі скрыню са смеццем, а назад вярнуць «забыліся». Устанавіць новую Сяргей Артамонаў паабяцаў жыхарам да 1 верасня. 

Ноткі весялосці ў вясковае жыццё ўнёс вакальны ансамбль «Беларусачка» Гарадзішчанскага вясковага Дома культуры. 

Мясцовы стараста Леанід Сенакосаў кажа, што ў вёсцы 15 жыхароў, летам завітваюць дачнікі. Звяртаюцца людзі ў асноўным па пытаннях вады, электраэнергіі, дапамагчы з дровамі. І, як запэўнівае Леанід Фёдаравіч, усё практычна вырашаецца тут жа, на месцы.

У ходзе сустрэчы выконваючы абавязкі начальніка РАНС Максім Кашо паведаміў, што з пачатку года ў раёне адбылося 14 пажараў, на якіх загінулі 3 чалавекі, і звярнуўся да прысутных з просьбай выконваць правілы пажарнай бяспекі. 

…Вёску Навасёлкі, наступны прыпынак сацыяльнага цягніка «Клопат», можна назваць глыбінкай хіба толькі з-за адлегласці ад райцэнтра. Па словах старшыні Гарадзішчанскага сельвыканкама Алены Шабунёвай, зарэгістравана тут каля 100 чалавек. 

Навасёлкаўцаў турбуюць як асабістыя пытанні накшталт падаткаабкладання, так і больш глабальныя. Напрыклад, адна з мясцовых жыхарак акцэнтавала ўвагу на старым, ужо амаль згніўшым дрэве. Сяргей Артамонаў зазначыў, што возьме гэты зварот на кантроль.

Усяго сацыяльны цягнік «Клопат» наведаў ужо вёскі Старашклоўскага, Фашчаўскага, Гарадзецкага і Гарадзішчанскага сельсаветаў. А наперадзе – новыя маршруты. Бо галоўнае ў «Клопаце» – данесці да кожнага вясковага жыхара, што праблемы асобнага чалавека хвалююць не толькі яго.