Музей гарадзішчанскай зямлі існуе ў ААТ “Навагарадзішчанскае”

ААТ “Навагарадзішчанскае” – сельгасарганізацыя з багатай гісторыяй. У 1957 годзе быў арганізаваны саўгас “Гарадзішча”, які стаў вядомы не толькі ў Беларусі. У 1977 годзе ён быў занесены на Усесаюзную Дошку гонару Выстаўкі дасягненняў народнай гаспадаркі. Быў узнагароджаны ордэнам Працоўнага Чырвонага Сцягу. Шмат яго працаўнікоў ўзнагароджваліся ардэнамі Леніна, Працоўнага Чырвонага Сцягу, “Знак Гонару”, Працоўнай Славы.

На жаль, усё меней і меней застаецца гэтых людзей. Для таго, каб захаваць гістарычную памяць, а таксама паказаць моладзі, на чые дасягненні трэба арыентавацца, па ініцыятыве намесніка старшыні па ідэалагічнай рабоце ААТ “Новагарадзішчанскае” Таццяны Крупенька ў адміністрацыйным будынку быў створаны музей сельгасарганізацыі.

У ім прадстаўлены матэрыялы, якія расказваюць пра гісторыю саўгаса “Гарадзішча”, ААТ “Новагарадзішчанскае”, далучанага да яго ААТ “Ардацкае”, фотаздымкі ветэранаў Вялікай Айчыннай вайны і працаўнікоў-ардэнаносцаў. Ёсць тут шмат прадметаў побыту вяскоўцаў з мінулых часоў.

Таксама каля адміністрацыйнага будынку размешчана мемарыяльная дошка ў гонар легендарнага кіраўніка саўгаса Трафіма Галіцы, узнагароджанага двума ардэнамі Леніна і ордэнам Працоўнага Чырвонага Сцягу.

Музей часта наведваюць як дарослыя, якія цікавяцца гісторыяй роднай зямлі, так і дзеткі. Менавіта ім, падрастаючаму пакаленню, працягваць слаўныя справы сваіх дзядоў і прадзедаў.

НА ЗДЫМКУ: адзін з этнаграфічных куткоў музея сельгасарганізацыі.