Конкурс праходзіў у Нацыянальнай бібліятэцы Беларусі і сабраў больш за 500 удзельнікаў. Арганізатарамі яго выступалі рэспубліканскае аб’яднанне “Сябры Вясёлкі” і часопіс “Вясёлка” і “Буся”, Нацыянальная бібліятэка Беларусі сумесна з дзяржаўнай установай адукацыі “Гімназія №32 г.Мінска”, пры падтрымцы прадзюсерскага цэнтра “Агні вялікага горада” Таццяны Волчак. 

У склад прафесійнага журы ўваходзілі: Уладзімір Ліпскі – галоўны рэдактар установы “Рэдакцыя часопіса “Вясёлка”, “Буся”, лаўрэат Дзяржаўнай прэміі Беларусі; Эдуард Зарыцкі – народны артыст Беларусі, кампазітар; Тадэвуш Стружэцкі – намеснік старшыні Беларускага фонду культуры; Яўген Крыжаноўскі – беларускі гумарыст, аўтар і галоўны рэжысёр Мінскага тэатра сатыры і гумару «Хрыстафор і іншыя.

Конкурс праходзіў па некалькіх намінацыях, сярод якіх: “Танец”, “Вакал”, “Інструментальнае выкананне” і інш. Намінацыя “Эстрадны вакал”, дзе выступалі нашы дзяўчаты, уключала тры ўзроставыя падгрупы і сабрала 46 удзельнікаў, у асноўным мінчан, сярод якіх і навучэнцы вакальных студый, што займаюцца падрыхтоўкай дзяцей да “Еўрабачання” і “Славянскага базару”. Кожная з таленавітых шклаўчанак, вытрымаўшы вялікую канкурэнцыю, заваявала Дыплом лаўрэата 3-й ступені. А Валерыя яшчэ і адзіная з 46 канкурсантаў сваёй намінацыі прымала ўдзел у гала-канцэрце.

Валерыя Ключнікава займаецца ў 4 класе па класу флейты ў педагога Людмілы Мікалаеўны Паўлавай, якая і параіла дзяўчынцы заняцца вакалам. У мінулым годзе дзяўчынка ўдзельнічала ў міжнародным фестывалі-конкурсе крэатыўнай творчасці “Апельсінавая бяроза” ў Оршы, дзе заваявала Дыплом 1-й ступені. На конкурсе “Калядная зорка” Валерыя выконвала песню “Нараджэнне Хрыстова”.

Ксенія Анісенка адкрывала выступленні старэйшай узроставай групы і адразу ж задала высокую планку. Ксюша займаецца ў 6 класе на тэатральным аддзяленні. Вакалам займаецца не так даўно, аднак, як бачым, ужо дасягнула значных вынікаў. 

Калі ў Ксеніі ярка выражаная эстрадная манера спеваў, то ў Валерыі – каларытны тэмбр голасу і добра атрымліваецца выкананне джазавых кампазіцый.Поспех дзяўчат – гэта заслуга як іх саміх, таленавітых, працавітых і мэтанакіраваных, так і бацькоў, адміністрацыі школы ў асобе дырэктара Алы Леанідаўны Сяднёвай і намесніка дырэктара па выхаваўчай рабоце Сяргея Іванавіча Каліноўскага, і, вядома ж, педагогаў Крысціны Леанідаўны Сталярэнка і Ірыны Алегаўны Прасаловіч.

Крысціна Леанідаўна – малады спецыяліст, пасля заканчэння Магілёўскага дзяржаўнага музычнага каледжа імя М.А.Рымскага-Корсакава вярнулася выкладаць у родную школу. Гэта добры, адкрыты чалавек, якога любяць дзеці і паважаюць калегі.

Ірына Алегаўна, выкладчык музычна-тэарэтычных дысцыплін – ідэйны натхняльнік канкурсантак. Яна дапамагала ў падборы рэпертуару, касцюмаў і, вядома, падтрымлівала іх псіхалагічна.

“Мы вельмі рады поспеху дзяўчынак, – кажуць педагогі. – Бо яны прадстаўляюць не толькі нашу школу, аднак і горад у цэлым. Гэта быў сурьёзны конкурс, мы старанна рыхтаваліся. І прывезлі адтуль не толькі дыпломы, аднак і вопыт. Паглядзелі на іншых канкурсантаў, і зараз ведаем, да чаго імкнуцца”. 

“Было хваляванне, аднак нас падтрымлівалі бацькі, педагогі, – дзеляцца ўражаннямі Ксенія і Валерыя. – На конкурсе былі моцныя сапернікі з прафесійных студый, аднак мы рыхтаваліся і былі ўпэўнены, што выступім дастойна”.

У далейшым Лера хоча прафесійна звязаць свой лёс з музыкай, а Ксюша марыць стаць журналістам, аднак збіраецца і на сцэне выступаць.

Пажадаем ім поспехаў!