«Спартакаўцы» ударна працуюць і хораша спяваюць

Спартыўныя дасягненні “спартакаўцаў” вядомыя даўно. Але аказваецца, што на фабрыцы не добра працуюць, займаюцца спортам, аднак і хораша спяваюць.  Тут доўгі час існуе вакальны ансамбль “Гулякі”, у складзе якога 2 салісты, 6 спевакоў, 8 танцораў.  

Пачаў сваю дзейнасць ансамбль у 2008 годзе, калі фабрыцы прапанавалі прыняць удзел у конкурсе мастацкай самадзейнасці. “Доўга думалі над назвай калектыву, – расказвае намеснік дырэктара фабрыкі па ідэалагічнай рабоце і кіраўнік ансамбля Анатолій Зубрыновіч. – Спыніліся на назве “Гулякі”. Яна народная, і адлюстроўвае здольнасць нашага народа добра папрацаваць, а потым весела адпачыць. І рэпертуар у ансамбля народны”.

Сярод удзельнікаў ансамбля Анатолій Уладзіміравіч адзначае Віктара Прадалячанка, Аляксандра Паўловіча, Андрэя Байдзіна, Алену Матронкіну, Людмілу Казакову, Наталлю Тарасюк і іншых.

“Гулякі” радуюць сваіх калег на ўнутрыфабрычных мерапрыемствах (Дзень лесу, шанаванне перадавікоў вытворчасці, гадавы сход), а таксама прымаюць удзел у раённых канцэртах, аглядах мастацкай самадзейнасці.  

Кіраўніцтва фабрыкі ўсяляк падтрымлівае ансамбль, напрыклад, стварыўшы добрыя ўмовы для рэпетыцый. Яны праходзяць з удзелам прадстаўніка раённага Дома культуры ў актавым зале фабрыкі, дзе добрая апаратура, а месца дазваляе рыхтаваць танцавальныя нумары.

Удзел у ансамблі “Гулякі” – гэта адзін з самых радасных момантаў у жыцці ўсіх яго ўдзельнікаў. Кожны ідзе на рэпетыцыі з добрым настроем, а потым перадае гэты настрой на канцэртах іншым.