Старажылы памятаюць, што крыніца тут была спрадвеку. Аднак аднойчы яна зарасла, прыйшла ў заняпад.

Намеснік дырэктара па ідэалагічнай рабоце ААТ “Новагарадзішчанскае”  Таццяна Крупенька расказала нам: “Адміністрацыяй нашай сельгасарганізацыі і Гарадзішчанскім сельсаветам было прынята рашэнне адрадзіць крынічку, прывесці ў парадак тэрыторыю вакол яе. Актыўны ўдзел у гэтай добрай справе прынялі мясцовыя жыхары, пасадзілі кветкі, дрэўцы, участкам “Жылкамгаса” была абкошана трава вакол, а дачнік Рыгор Шындзікаў, які мае сваю пілараму, выдзеліў неабходныя матэрыялы для ўпарадкавання гэтай крынічкі. Усё было зроблена на энтузіазме і пры ўсеагульным адабрэнні літаральна за адзін месяц – верасень”.

Перад пачаткам урачыстага рытуала людзі перагаворваліся:

– Бабуля расказвала мне, што раней гэтую крынічку ўвесь час асвячалі…

– Я заўсёды тут ваду бяру, яна доўга стаіць… Звычайная зелянню пакрыецца, а крынічная і не думае сапсавацца…

Святар Спаса-Прэабражэнскай царквы Шклова айцец Андрэй прачытаў малебен, асвяціў ваду і акрапіў святой вадой усіх сабраўшыхся. Сама прырода радавалася: калі святар спусціўся да крынічкі, нечакана ў даволі пахмурны і халодны дзень выглянула сонца.

Пасля ўсяго айцец Андрэй адзначыў, што вада атрымала лекавую сілу, і зараз ёй можна асвячаць  і людзей, і свае дамы. І прапанаваў асвячаць крынічку кожны год у гэты ж дзень.

Трэба сказаць, што крыніца знаходзіцца ў вельмі прыгожым і маляўнічым месцы, і ў цёплую пару года сюды можна прыходзіць, каб адпачыць усёй сям’ёй і папіць чыстай халоднай вады.

Вольга ДАНІЛАВА