Дзень беларускага пісьменства адбудзецца ў Шчучыне

Літаратурная старонка гісторыі Шчучынскага раёна ў першую чаргу звязана з творчасцю Цёткі. Алаіза Пашкевіч, вядомая паэтэса, сястра міласэрнасці, актрыса і педагог нарадзілася ў гэтых месцах. Яе «Першае чытанне для дзетак беларусаў» – адзін з першых буквароў на беларускай мове. 

У гэтым годзе новым мерапрыемствам Дня беларускага пісьменства стане сустрэча пісьменнікаў з жыхарамі горада. На свяце літаратуры і літаратараў у Шчучыне Саюз пісьменнікаў не толькі па традыцыі падорыць кнігі юным чытачам, але і стане арганізатарам футбольнага спаборніцтва на прыз Саюза пісьменнікаў.

Як паведаміла міністр інфармацыі Беларусі Лілія Ананіч, у Шчучыне да Дня беларускага пісьменства адкрыюць першую кнігарню-кавярню. ААТ "Белкніга" павінна адкрыць новы аб’ект у раённым цэнтры да 1 верасня. Крама стане сапраўдным падарункам жыхарам раёна да свята. У ім будзе шырока прадстаўлена кніжная прадукцыя ў першую чаргу айчынных аўтараў і выдавецтваў. Акрамя таго, Дзень пісьменства ў Шчучыне паслужыў нагодай для адкрыцця ў раённым цэнтры гандлёвага павільёна "Белсаюздруку". З’яўленне двух новых аб’ектаў, звязаных з кнігай і друкам, з’яўляецца знакавым. Шчучын як раённы цэнтр павінен пакласці пачатак адкрыццю падобных аб’ектаў і ў іншых гарадах.

Да свята беларускага пісьменства ў Шчучыне абнавяцца таксама мясцовая бібліятэка, Дом культуры, палац князёў Друцкіх-Любецкіх, які запоўніцца фота- і літаратурнымі экспазіцыямі. Яшчэ адным кніжным праектам стане прэзентацыя факсімільных выданняў Францыска Скарыны і перадача іх раённай бібліятэцы Шчучына.

Святкаванне Дня беларускага пісьменства адбудзецца ў Шчучыне 6 верасня. Галоўнымі яго тэмамі стануць Год моладзі, 70-годдзе Перамогі і 500-годдзе беларускага кнігадрукавання, якое будзе адзначацца ў 2017 годзе.